طفل صغير يحمل يديه الصغيرتين ويصفع رجل فى سن والده او اكبر منه بمرحلتين "
(مشهد ف فيلم).
مشهد بقى بـــ يتكرر بشكل مستفز جداا ف معظم الافلام ومش فاهمة السبب !! ف هدم المعايير التربوية المتعارف عليها
تكراره بيخلى العقل يستقبله بشكل بديهى جدا وان دى حاجة طبيعية .
ممكن نشرح مع بعض بشكل بسيط دة هيحصل لعقلنا ازاى بشكل لاشعورى واحنا مش حاسين .
المشهد كالاتى :
ف مشهد مفعم بالكوميديا بــ ييجى الطفل وقاعد جانبه رجل مسن _أو ف سن والده_ ويقوم رافع ايديه ع وشه !!
لـحظة .. ان هذا المشهد ليس بالمهم على قدر اهمية ردة فعل من يصفعه , ألا وهو (الرجل الاكبر منه سناً). !!
نأتى هنا لــ ردة الفعل :!!
بعد تلك الصفعة نجد أن هذا الرجل (وف كل الافلام) يفعل شيئين فقط:
اما انه يتبع هذه الصفعة بضحة _هيهيهيهيه_ بلهاء تثير استيائى , او يقول _وهو ف مكانه لايتحرك_ خد هنا ياااد يا ابن الــ .... وينتهى المشهد !!
وطبعا هنا المطلوب من سيادتنا اننا نــ هاهاهاهاها (نضحك بقلب جامد) !
ودة اللى بيحصل ... صح ولا انا غلطانة؟؟ :D
وطبعا زى ما احنا عارفين ان سهل اوى ازرعلك فكرة ف عقلك اللاواعى وانت ف قمة فرحك او غضبك ..
وهو دة بالظبط اللى بيعملوه لغاية ما شوية شوية وانت عقلك ف حالته الطبيعية يستقبل دة بشكل طبيعى جدا ومفيش مشاكل فيه !!
"يعنى انت سيادتك كــ أب\أم , أخ\اخت قاعدين تربّوا ف البيت , ودول ف الافلام _بسم الله, الله اكبر_ قاعدين يهدّوااا شغالين ف دايرة لاعبنى وانا الاعبك ".
- اللى خلانى اكتب الموضوع دة وأُستفز انى لاقيت اخويا عمرو_ابن الـ 5 سنوات_ اثناء المشهد دة بيقولى :
سارة شايفة الولد دة بيضرب الراجل ازاى (وع وشه ابتسامة كبيرة ^ ^) حسيته وكأنه بيقولى : يعنى دة عادى ياسارة اهو ؟!
رديت عليه بسرعة وقلتله: ع فكرة الولد دة قليل الادب ومش متربى والراجل الكبيردة شخص تافه :]
فكرنى المشهد دة بموقف حصلى ف واقعى وانا صغيرة : ( كنت رايحة بقول لمدرسة عندى , لو سمحتى ياميس "انتى" ....... ).
وساعتها استاءت منى جدا ان ازاى بنت مؤدبة زيك تقول" انتى" , اسمها "حضرتك" وكانها جريمة كلمة "انت " لـ حد اكبر منى !!
اتحفر جوايا الموقف دة باسم المدرسة وشكلها والمكان اللى قالتلى فيه وفعلا بقيت اقول حضرتك بشكل تلقائى وبقت الكلمة بتعنى لى كطفلة احترام كبير جدا للاكبر سنا.
حساكوا بتقولوا لى انت عايزانا نعمل ايه دالوقتى ؟!
حاضر هقولكوا:
لان الاطفال بيكونوا الاساس عشان نقدر ننشىء جيل صح ف اننا نشربهم التعاليم السليمة لانها بتكون بمثابة غرس جوة الطفل (بمعنى ابسط من شبّ ع شىء شاب عليه ).
فــ هنعمل الاتى :
اولا- ان اى حركة وتصرف يصدر عن الطفل بشكل غلط وبيضحكنا , ياريت نبطل ضحك شوية لان احنا مش ف مشهد كوميدى ع شاشة صغيرة دالوقتى .. اووك ؟.
ونفتكر ان الحركة دى لو صدرت منه وهو كبير ساعتها هنعيط مش هنضحك ووقتها صعب تقوليله ما يعملهاش..
- نصحح الافعال اول باول وكمان مش قصدى ننصحه بشكل عدوانى , لأ نفتح ساحة للحوار والمناقشة بينى وبينه عشان عقله يتفتح كدة ويقدر هو يحلل المواقف ويستنتج الصح من الغلط فيما بعد..
ثانيا- لو شفنا مشهد زى دة ع التليفزيون جه غصب عننا ف سياق المشاهدة العامة ولاننا مش هنقدر نسيطر ع كل اللى بيتعرض..
اقوم انا اجى بشويش خالص واوشوش الطفل ف ودنه واعصابى هادية: ( اقوله عارف ياحبيبى ان اللى بيعمله الولد دة غلط وافهمه انه بيمثل وانه ما يقدرش يعمل كدة مع والده برة الفيلم " وقيسوا ع كدة بقى مشاهد تانية عايزين تصححوها ونتيجتها هايلة J
وحتة اسلوب التصحيح دى اسيبها عليكم وكل واحد فيكم واسلوبه وطريقة كلامه.. المهم نقتنص الفرصة ساعتها لزرع القيم الصح بتصحيح الغلط ..
صدقونى اطفال كتير حوالينا يهمونا محتاجين كلمة بسيطة مننا تغير مفهوم غلط , محتاجين الوشوشة الجانبية دى , ما تتاخروش تزرعوا نبتة جميلة جوة اطفالكم بتكون مش محتاجة غير دقيقة ممكن تضيعوها وانتم مش واخدين بالكوا .
والحكاية مش مقتصرة ع ابنك او اخوك , لا..لـ اى طفل جانبك جالك الفرصة انك تعطيه نصيحة ما تتاخرش تغرس فيه غرسة طيبة مش هينساهالك (وعند ربنا كل دة مكتوب وسيرد لك اكيد )
*ازرع خير ف صِغرهم ســ تُجنى ثمار كلها طيب ف كِبرك وكِبرهم*
الاخصائي النفسى :
سارة سرحان .
عايزين نعلمهم دة :)
